Xaçmaz rayonunda yol kənarında yerləşən irigövdəli ağacın aşma təhlükəsi yerli sakinlərin ciddi narahatlığına səbəb olub.
Shimal.News-un əldə etdiyi məlumata görə, Uzunoba yolu adlanan ərazidə, Nərəcan dəmir yolu yaxınlığında uzun müddətdir ki, təhlükəsizlik tədbirləri görülmür. İri ağac yolun hərəkət hissəsinə doğru əyilib və istənilən an aşma riski var.
Sakinlərin sözlərinə görə, bir neçə kəndin intensiv istifadə etdiyi bu yol artıq açıq təhlükə mənbəyinə çevrilib. Onlar bildirirlər ki, iki il əvvəl həmin ərazidə başqa bir ağac avtomobilin üzərinə aşıb, nəticədə bir nəfər kəllə-beyin travması alıb, digər şəxsin ayağı sınıb. Ötən il isə irigövdəli ağac kökündən qoparaq başqa bir nəqliyyat vasitəsini yararsız hala salıb.
Yerli əhali qeyd edir ki, son dövrlər bu kimi riskli vəziyyətlərə vaxtında reaksiya verilməməsi narahatlıq doğurur. Sakinlər mümkün bədbəxt hadisələrin qarşısının alınması üçün aidiyyəti qurumları təxirəsalınmaz tədbirlər görməyə çağırırlar.
