Xaçmaz rayon və şəhər ərazilərində fəaliyyət göstərən heyvan satışı bazarlarında ciddi nöqsanlar aşkarlanıb. Bu haqda ShimalNews 3 aprel tarixində məlumat verir.
Azərbaycan Respublikasının Qida Təhlükəsizliyi Agentliyi (AQTA) tərəfindən epizootoloji stabilliyin qorunması, baytarlıq nəzarətinin təmin edilməsi, bu sahədə fəaliyyətlərin tənzimlənməsi məqsədilə monitorinq həyata keçirilib.
Bazarların ərazisinin sərhədlənməsi primitiv üsullarla, yəni xəndək qazmaqla və ya məftil hasar çəkməklə təşkil edilib. Bu isə qapalılıq rejiminin qorunmasını təmin etmir. Habelə antisanitar vəziyyətin yaranması, heyvan daşınmasının müvafiq təlimatlara uyğun yerinə yetirilmədiyi, mütəmadi təmizlik və dezinfeksiya işlərinin görülmədiyi aşkarlanıb.
Göstərilənlər nəzərə alınaraq, bazar rəhbərlərinə məktublar ünvanlanıb, mövcud nöqsanların aradan qaldırılması üçün müddət təyin edilib və müvafiq təlimatlar təqdim olunub.
