Baş Mütəşəkkil Cinayətkarlıqla Mübarizə İdarəsi Qusar, Xaçmaz və bir sıra rayonlarda qanunsuz silah saxlanılmasını aşkar edib. Bu barədə ShimalNews 3 iyul tarixində Daxili İşlər Nazirliyinə istinadən məlumat verir.
Sadalanan rayonlarla yanaşı, Sumqayıt şəhərində, Balakəndə və Sabirabadda əməliyyat keçirilib. Nəticədə qanunsuz olaraq odlu silah əldə edib saxlayan şəxslər - Teymur Nərimanov, Samir Şəkiliyev, Emin Bağıyev, Bəyanət Əsgərov və Eldəniz Fərzəliyev saxlanılıblar.
Teymur Nərimanovdan 1 ədəd “Minta-37” markalı tapança, 1 ədəd patron, 1 ədəd patron darağı, Samir Şəkiliyevdən 1 ədəd “Naqan” markalı tapança, Emin Bağıyevdən “AKS-74” markalı avtomat silah, 1 ədəd patron darağı, 27 ədəd patron, Bəyanət Əsgərovdan 1 ədəd lüləsi və qundağı kəsilmiş "TOZ” markalı tüfəng, Eldəniz Fərzəliyevdən isə “ Kalaşnikov” markalı avtomat, 19 ədəd patron və 1 sandıqça aşkar olunaraq götürülüb.
Faktlarla bağlı Cinayət Məcəlləsinin müvafiq maddələri ilə cinayət işləri başlanılıb. Adları sadalanan şəxslər barəsində həbs qətimkan tədbirləri seçilib.
