Xaçmaz rayonunda adı qeyri-etik davranışda hallanan müəllim vəzifəsindən azad olunub. Bu haqda ShimalNews 14 mart tarixində xəbər verir.
Quba-Xaçmaz Regional Təhsil İdarəsinin bildirdiyinə görə, Qusarçay kənd tam orta məktəbinin idman müəlliminin 8-ci sinif şagirdinə qarşı uyğunsuz hərəkətləri ilə bağlı yayılmış informasiya araşdırılıb. Araşdırmanın nəticəsində məlum olub ki, bu barədə xəbər tutan kimi direktor və sosial pedaqoq tərəfindən həmin şagirdlə söhbət aparılıb və bundan sonra müvafiq olaraq, hüquq-mühafizə orqanlarına məlumat verilib.
Yoxlama başlanılan zaman 62 yaşlı müəllim Təbriz Adıgözəlov öz ərizəsi ilə işdən azad olunmaq üçün müraciət edib. Onunla bağlanmış əmək müqaviləsinə xitam verilib.
Bundan əlavə, məktəbin direktoru səlahiyyətlərini icra edən direktor müavini də işdən azad edilməsi üçün ərizəsini təqdim edib.
Məsələ hüquq-mühafizə orqanları tərəfindən araşdırılır.
Daha öncə idman müəlliminin dərs zamanı qiymət yazmaq qarşılığında şagird qıza qeyri-etik hərəkət törətməsi haqda məlumat vermişdik.
