Xaçmaz rayonunun Yalama kəndi ərazisində aprel ayında törədilərək bağlı qalmış qəsdən adam öldürmə cinayətinin üstü açılıb. Bu haqda 26 iyun tarixində ShimalNews Baş Prokurorluğa istinadən məlumat verir.
Aprelin 9-u saat 23:00 radələrində kənd sakinləri - 60 yaşlı Aslan Tarverdiyev və 58 yaşlı Rumayə Tarverdiyevanın yaşadıqları evdə baş vermiş yanğından sonra meyitlərinin hadisə yerində aşkar olunması faktı üzrə Xaçmaz rayon prokurorluğunda cinayət işi başlanılıb.
Araşdırma nəticəsində 27 yaşlı Ramin Ağaxanovun zərərçəkmiş şəxslərə xeyli miqdarda borcunun olması müəyyən edilib. Raminin öhdəliklərdən yayınmaq üçün yaşadıqları evə gələrək Tarverdiyevləri qəsdən öldürməsi, cinayət əməlini gizlətmək və cinayətin izlərini məhv etmək məqsədilə evi qəsdən yandırması və bundan sonra hadisə yerini tərk etməsinə əsaslı şübhələr müəyyən edilib.
Ağaxanov şübhəli şəxs qismində tutularaq istintaqa cəlb olunub.
