Qax rayonunun Əmbərçay kəndində qədim el adətləri yaşadılaraq Novruz bayramı münasibətilə at yarışı təşkil olunub.
Shimal.News xəbər verir ki, yarışda Qax şəhəri, Qaradolaq və Əmbərçay kəndlərindən ümumilikdə 30 atlı iştirak edərək öz məharətlərini nümayiş etdiriblər. Çaparlar 6 kilometrlik məsafədə finiş xəttinə çatmaq uğrunda gərgin mübarizə aparıblar.
Yarışı izləmək üçün kənd sakinləri ilə yanaşı ətraf ərazilərdən də çoxsaylı qonaqlar Əmbərçaya toplaşıb. Qızıl medala Əmbərçay kənd sakini Sahib Muxtarov layiq görülüb. Qaliblər diplom, medal və hədiyyələrlə mükafatlandırılıb, kəndin mərkəzi meydanında isə Novruz şənliyi təşkil olunub.
Bu eldə at yarışı ənənəsi 1990-cı illərin sonuna qədər davam edib. Sonra isə uzun illər az qala unudulub. Lakin son 8 ildə bu gözəl ənənə yenidən bərpa olunub və artıq 6-cı dəfədir ki, keçirilir.
