Xəbər verdiyimiz kimi, noyabrın 4-də paytaxtın Bəşir Səfəroğlu küçəsində - "Efkar Meyhane" adlı məkanın yaxınlığında 2006-cı il təvəllüdlü Yasin İbadov çoxsaylı bıçaq xəsarətləri alaraq həyatını itirib. Hadisəni törətməkdə şübhəli bilinən mərhumun əmisi hüquq-mühafizə orqanları tərəfindən saxlanılıb.
Bakı Ağır Cinayətlər Məhkəməsində təqsirləndirilən Babək İbadovun cinayət işi üzrə məhkəmə prosesi keçirilib.
Hakim Elmin Rüstəmovun sədrliyi ilə keçirilən iclasda proses təqsirləndirilən Babək İbadovun ifadəsi ilə davam edib.
Babək İbadov ifadəsində bildirib:
"Yasin ailəliklə bizi bloklamışdı. Bir il əvvəl icarəyə kafe işlədirdim, işlədim, onu da yanımda işə götürmüşdüm. Babamızın adını daşıdığı üçün Yasini əzizləyirdik. Mən onun cinsi azlıq nümayəndəsi olduğunu hiss etməmişdim. Yasin iyun ayında imtahan sessiyası üçün Mingəçevirə getmişdi, bir aydan sonra qayıdacaqdı. Anası zəng edib ağlamağa başladı ki, Yasin evə gəlmir. Öz "Instagram" səhifəsində Türkiyəyə uçmaq üçün aldığı biletin şəklini paylaşmışdı.
Bir gün sonra qardaşımla birlikdə pul tapıb Türkiyəyə getdik. Dedik ki, bu sadəlövh uşaqdır, tapıb evə gətirək, pis vərdişlərə qurşanmasın. Rayondakı qohumlar hətta qurban da demişdilər ki, tapılsa, qurban kəsəcəyik. İstanbulda hüquq-mühafizə orqanlarına da müraciət etdik. Onlar bizə dedilər ki, bu, 19 yaşını tamam etmiş insandır, istəməsə, onu zorla apara bilmərik.
Noyabrın 1-də "Instagram"da Yasinin üzü və dodaqları boyalı, gözləri sürməli şəkli qarşıma çıxdı. Telefonu əsəblə kənara tulladım. Evdəkilər əsəbiləşdiyimi görüb dedilər ki, boş ver, bəlkə montaj ediblər. Mən müharibə iştirakçısı olmuşam, parada gedəcəkdim. Amma buna görə getmədim ki, kimsə tanıyıb bilsə, biabır olaram.
Hadisə günü Yasin məni görən kimi biədəb səslərlə qışqırdı:
"Kömək edin, nə olar kömək edin". Müharibədən bəri 5 ildir üstümdə gəzdirdiyim bıçağı zərblə Yasinin kürəyinə sancdım. Özümə gələndən sonra bildim ki, ona 20 dəfə bıçaq zərbəsi vurmuşam. Bir də baxdım ki, yerə sərilib. Dəqiq xatırlamıram, ayılanda bir səsin "Sən nə elədin?" dediyini eşitdim. Sonra bir polis yaxınlaşdı. Əllərimi uzadıb dedim ki, "Qandalla qollarımı". Əməlimdən peşmanam. Soyadını çıxarsaydı, itib cəhənnəm olsaydı, onunla işim olmazdı".
Məhkəmənin növbəti iclası fevralın 23-nə, saat 11:20-yə təyin olunub.
Onu da xatırladaq ki, cinsi azlıq nümayəndəsi olan Yasin İbadov Şamaxı rayonundandır.
Mənbə: Lent.az
