Azərbaycanın əksər yerlərində yağıntılı hava şəraiti davam edir, dağlıq və dağətəyi rayonlarda qar yağır.
Yollarda hərəkətin təhlükəsiz və fasiləsiz təmin olunması istiqamətində zəruri addımlar atılır.
Belə ki, Quba rayonunun Qonaqkənd, Qəbələ rayonunun Laza, Şamaxı rayonunun Əngəxaran-Çuxuryurd, Pirqulu-Dəmirçi, Nağaraxana və Avaxıl kəndlərində, eyni zamanda, Muğanlı-İsmayıllı, Lahıc-Burovdal istiqamətində, Qusar-Şahdağ avtomobil yolunda hərəkətin təhlükəsizliyi və fasiləsizliyi təmin edilməsi üçün gecə boyu və səhər saatlarında buzlaşmaya qarşı tədbirlər görülüb, yola duz-qum qarışığı səpilib.
Onu da qeyd edək ki, yağan qarın hündürlüyü Əlibəydə (Zaqatala) 41, Sarıbaş (Qax) 35, Kişçayda (Şəki) 26, Qrızda 22, Xaltanda 17, Qusarda 11, Xınalıq və Xızıda 10, Şahdağ və Qubada 9, Qəbələdə 7, Oğuzda 5, Balakəndə 1 sm-dir.
Balakən, Qax, Şəki, Qəbələ, Oğuz, Şamaxı, Quba, Qusar, Zaqatala, Qrız, Xaltan, Şahdağda duman müşahidə olunur, görünüş məsafəsi 500 metrədək məhdudlaşır.
