Şimal bölgəsində aqrar sahəni təhdid edən qəhvəyi mərmər bağacığı ilə bağlı regional müşavirə keçirilib. Tədbir Xaçmaz şəhərində baş tutub.
Shimal.News xəbər verir ki, müşavirədə Kənd Təsərrüfatı Nazirliyi, Ekologiya və Təbii Sərvətlər Nazirliyi, Azərbaycan Respublikasının Qida Təhlükəsizliyi Agentliyi (AQTA), Xaçmaz, Quba və Qusar rayon icra hakimiyyətlərinin rəhbərləri, Şəki-Zaqatala iqtisadi rayonunda fəaliyyət göstərən Dövlət Aqrar İnkişaf Mərkəzlərinin direktorları və bitki mühafizəsi sahəsində çalışan mütəxəssislər iştirak ediblər.
Xaçmaz Rayon İcra Hakimiyyətinin başçısı Elnur Rzayev bildirib ki, rayonda zərərvericilərə qarşı sistemli tədbirlər görülür və məqsəd aqrar sahəyə dəyən zərəri minimuma endirməkdir. Onun sözlərinə görə, mübarizənin effektiv olması üçün fermerlərin məlumatlandırılması və profilaktik tədbirlərin genişləndirilməsi əsas şərtdir.
Kənd təsərrüfatı naziri Məcnun Məmmədov isə daha ciddi xəbərdarlıq edib: qlobal ticarət və iqlim dəyişiklikləri fonunda ölkəyə daxil olan invaziv zərərvericilər arasında qəhvəyi mərmər bağacığı ən riskli növlərdən biridir. Xüsusilə meyvəçilik və fındıqçılıq üçün real təhlükə yaradan bu həşərat artıq Şəki-Zaqatala ilə yanaşı Quba-Xaçmaz bölgəsində də geniş yayılıb. Nazir vurğulayıb ki, Xaçmaz və Qusar hazırda əsas risk zonaları hesab olunur.
Təklif olunan tədbirlər sırasında:
Bioloji mübarizə üsullarının tətbiqi;
Bağların və kəndətrafı meşəliklərin planlı dərmanlanması;
Könüllü qrupların prosesə cəlb edilməsi;
Əhalinin maarifləndirilməsi yer alır.
Ekologiya və Təbii Sərvətlər Nazirliyinin nümayəndələri zərərvericinin ekoloji təhlükə yaratdığını qeyd edərək meşə və meşəətrafı ərazilərdə birgə tədbirlərin davam etdirildiyini bildiriblər. AQTA isə regionlarda aparılan monitorinq və koordinasiya işləri barədə hesabat təqdim edib.
Müşavirədə 2026-cı il üçün mübarizə planı geniş müzakirə olunub. Mesaj aydındır: Şimalın bağlarını qorumaq üçün koordinasiyalı və davamlı mübarizə qaçılmazdır.
