Novruz bayramı ilə əlaqədar tətil günləri turistlər şimal bölgəsindəki hotellərə üz tutacaqlar. Hotellərin bu ərəfədə qiymətləri haqda ShimalNews 18 mart tarixində məlumat verir.
İsmayıllıda yerləşən “Basqal Resort & SPA“da 2 nəfərlik otaqların qiyməti 330 manatdan başlayır. Hovuzlu VIP kottecin qiyməti isə 1725 manatdır. Qiymətə səhər yeməyi (açıq bufet), şam yeməyi (açıq bufet), uşaq zonası, uşaq otağı və SPA xidmətləri (qapalı hovuz, sauna, buxar otağı və fitnes zalı) daxildir.
“Su Meyilli Hotel & Spa”da bayram günlərini keçirmək istəyənlər üçün hotel otağının bir gecəsi 120 manatdan başlayır. Qiymətə səhər yeməyi daxildir.
“İsmayilli Resort Hotel”də isə 19-26 mart tarixləri aralığında 1 gecəlik otaq qiyməti 140 manat olacaq. Bu qiymətlərə səhər yeməyi, spa xidmətləri (hamam, sauna, şok hovuz), böyüklər üçün fitnes və uşaqlar üçün oyun mərkəzindən istifadə daxildir.
“Vogue Hotel Nabran”da Novruz bayramı paketi 2 gecə 3 gün üçün nəzərdə tutulub. Canlı musiqi, DJ, əyləncəli oyunlar, 21 mart səhər və axşam yeməyi daxil standart 2 nəfər üçün qiymət 299 manat təşkil edir.
“Quba Palace Hotel” Novruz bayramı günlərini bayram konserti, tonqal, şən əhvali-ruhiyyə ilə qeyd etməyi təklif edir. 2 nəfər üçün 1 gecənin qiyməti 195 manatdır. Bu qiymətə dağ mənzərəli “deluxe” otaqda gecələmə, geniş çeşidli səhər yeməyi (açıq bufet), SPA (qapalı hovuz, idman zalı, türk hamamı, sauna) və Novruz bayramı proqramı daxildir.
Qubada yerləşən “Macara Lake Resort” 5 cür yerləşmə təklif edir. Novruz bayramı günlərində “Townhouse Standard” otaqlar 190 manatdan, “Lake Park” binasında standart otaqlar isə 200 manatdan başlayır.
Qusarda yerləşən “Ladera Resort”da da bayram əyləncələri təşkil ediləcək. 2 nəfər üçün hoteldə yerləşmə haqqı 150 manat təşkil edir. Qiymətə səhər yeməyi daxildir.
“Shahdag Resort”da 2 böyük üçün 1 gecə 100-200 manatdan başlayır.
