Dağlıq və dağətəyi rayonlarda yağan intensiv yağışlar nəticəsində axan çaylarda sululuq artıb. Bu haqda ShimalNews 15 iyun tarixində məlumat verir.
Milli Hidrometeorologiya Xidmətının Hidrologiya mərkəzinin direktoru Asif Verdiyev bildirib ki, sel təhlükəsi olan Quba-Qusar ərazisindən axan çaylarda baş verə biləcək sel və daşqınlarla əlaqədar həmin ərazilərdə çayların sahilində yaşayan və orada istirahət edən vətəndaşlar diqqətli olmalıdırlar.
“Nəzərə almaq lazımdır ki, bu, çox təhlükəlidir. Axının istiqamətinin hansı anda dəyişə biləcəyi heç kimə məlum deyil. Sel hadisəsi başlayan kimi, dərhal həmin ərazi tərk edilməlidir”.
Qeyri-sabit, yağıntılı hava şəraitinin iyunun 17-si axşamadək davam edəcəyi gözlənilir.
