Şabran şəhəri Heydər Əliyev prospektində şəhid ailələri və əlillər üçün inşa edilən çoxmənzilli binada yaşayan sakinlər illərdir ki, problemlərin əlində qalıblar.
Onlar Shimal.News-a bildiriblər ki, binanın həyətində istirahət üçün nəzərdə tutulan yaşıllıq sahəsi zəbt olunub. Bu səbəbdən uşaqlar təhlükəli şəkildə avtomobil yolunda oynamağa məcbur qalırlar ki, bu da istənilən an faciəyə yol aça bilər.
Bundan əlavə, binanın dam örtüyü də tamamilə yararsız vəziyyətdədir. Yağış yağan kimi mənzillərə su dolur, vətəndaşların əmlakına ziyan dəyir və sağlamlıqları təhlükə altına düşür.
Məsələ ilə bağlı Şabran Rayon İcra Hakimiyyətinə dəfələrlə müraciət olunub. Lakin bu günə qədər problemlərin həlli ilə bağlı heç bir addım atılmayıb. Sakinlərin sözlərinə görə, illərlə gözlədikləri bu binada rahat yaşayacaqlarına ümid etsələr də, nəticə ürək açan olmayıb.
