Şabran şəhərində qanunsuz sərnişindaşıma ilə bağlı problem aktuallığını qoruyur. Bir müddət əvvəl sürücü ilə sərnişin arasında mikroavtobusda baş verən mübahisə ilə bağlı yayılan məlumat bu məsələni bir daha gündəmə gətirib. Həmin hadisədən sonra ümid var idi ki, Azərbaycan Yerüstü Nəqliyyat Agentliyi (AYNA) məsələyə müdaxilə edəcək, nəzarəti gücləndirəcək. Ancaq görünən odur ki, qurum ya məsələni görməzdən gəlir, ya da tədbir görməkdə maraqlı deyil.
Shimal.News-a daxil olan məlumata görə, hazırda Şabran şəhərinin mərkəzində, elə avtovağzalın qarşısında, işıqforun altında, yolun hərəkət hissəsində qanunsuz sərnişindaşıma açıq şəkildə davam edir. Nə nəqliyyat müfəttişi var, nə də polis əməkdaşı. Yəni bu ərazi bir növ “sərbəst zona”ya çevrilib. Hər gün qanunsuz mikroavtobuslar sərnişin daşıyır, heç bir təhlükəsizlik və qanuni tənzimləmə olmadan.
Bu vəziyyət həm də rəqabət mühitinə ciddi zərbə vurur. Qanuni daşıyıcılar zərərə düşür, sərnişinlər isə nə sığortalanır, nə də standartlara uyğun nəqliyyatdan istifadə edir. Ən pisi isə odur ki, problem şəhərin tam mərkəzində, hər kəsin – o cümlədən aidiyyəti qurumların gözünün qarşısında yaşanır.
Sual yaranır: AYNA və digər müvafiq qurumlar niyə susur? Yalnız hadisə baş verəndən sonra reaksiya verməkmi lazımdır? Yoxsa bu qanunsuz fəaliyyətə göz yumulması kimlərəsə sərf edir?
