Şabran rayonu Rəhimli kəndində ərinə yuxu dərmanı verən qadın döyülüb.
Oxu.Az-ın məlumatına görə, kənd sakini, 1998-ci il təvəllüdlü Əli Mərdanov (soyadı şərtidir) həmkəndlisi Aytacı evlənmək məqsədilə qaçırıb, toy edib. Toy məclisində oğlan tərəfi gəlinə zinət əşyaları hədiyyə ediblər.
Bir müddət sonra ailə başçısı, həyat yoldaşının bacısı ilə telefon yazışmalarını görüb. Mesajlardan məlum olub ki, qadın gecə ona yuxu dərmanı verərək yatızdırır və kişinin bundan xəbəri olmur. Mesajları oxuyan Əli məsələni açsa da, xanımı hər şeyi inkar edib və aralarında mübahisə yaranıb.
Bir neçə gündən sonra Aytacın bacısı onların birgə şəklini paylaşıb və bu məsələ də ailədə yeni narazılığa səbəb olub.
Bir neçə gün sonra oğlanın anası gəlindən qızlları tələb edib və onların lombarda qoyulub pul götürüləcəyini bildirib. Amma qadın buna etiraz edib. Ananın məlumat verməsindən sonra oğul özü zinət əşyalarını istəsə də, qarşı tərəf yenidən imtina edib. Nəticədə mübahisə zamanı Əli Aytacı şillə və təpik zərbələri ilə döyüb.
Hadisə yerinə polis əməkdaşları gəliblər və faktla bağlı cinayət işi başlanıb, iş məhkəməyə göndərilib.
Şabran Rayon Məhkəməsində keçirilən prosesdə tərəflər arasında barışıq elan olunub. Məhkəmə buna görə cinayət işinə xitam verib.
