Şabran sakinləri lil qarışıq sudan istifadə edirlər
Şabran rayonunun Taxtalar kəndində içməli su problemi ciddi narazılığa səbəb olub.
Shimal.News-a danışan sakinlərin sözlərinə görə, kəndə gələn suyun tərkibi lil və çirkabdan ibarətdir ki, bu da insan sağlamlığı üçün böyük təhdid yaradır.
Sakinlər bildirirlər ki, onlar uzun müddətdir bu keyfiyyətsiz sudan istifadə etməyə məcburdurlar.
“Kranı açanda su gəlmir, sanki palçıq axır. Bununla yemək bişirmək, çay dəmləmək, hətta gündəlik istifadə belə çətindir. Amma hər ay bu suya görə pul ödəyirik,” - deyə bir sakin gileylənib.
Aidiyyəti qurumlara dəfələrlə müraciət edilsə də, problem hələ də həll olunmayıb. Bəzi hallarda şikayətlərə cavab verilmədiyi deyilir:
“Sanki bizi saymırlar, insan həyatının təhlükəyə atıldığını fərq etmirlər,” - sakinlər bildiriblər.
