Ali Məhkəmədə yol-nəqliyyat hadisəsi ilə bağlı təqsirləndirilən Əzim Balayevin (ad və soyad şərtidir) işi üzrə kassasiya protesti və kassasiya şikayətinə baxılıb.
Pravda.az-ın əldə etdiyi məlumata görə, hakim Teyyub Muxtarovun sədrliyi ilə keçirilən iclasda qərar elan olunub. Qərara əsasən, nə dövlət ittihamçısının kassasiya protesti, nə də zərərçəkmiş şəxsin hüquqi varisinin kassasiya şikayəti təmin edilib.
Hadisə 2023-cü il martın 25-də, saat 09:30 radələrində Şabran rayonunun Uzunboyad kəndi ərazisində baş verib. Əzim Balayevin idarə etdiyi traktor dəmir yolu keçidində qatarla toqquşub. Nəticədə traktor keçidə nəzarət edən gözətçi - N. İsgəndərovun üzərinə aşıb. O, hadisə yerində həyatını itirib.
Şabran Rayon Məhkəməsinin hökmü ilə Əzim Balayev 4 il 10 ay müddətinə azadlıqdan məhrum edilib. O, cəzasını məntəqə tipli cəzaçəkmə müəssisəsində çəkməlidir.
Hökmdən narazı qalan dövlət ittihamçısı apellyasiya protesti versə də, Sumqayıt Apellyasiya Məhkəməsi protesti təmin etməyib. Daha sonra dövlət ittihamçısı və zərərçəkmişin hüquqi varisi kassasiya qaydasında Ali Məhkəməyə müraciət edib. Lakin yüksək instansiya onların arqumentlərini əsaslı saymayaraq əvvəlki qərarı qüvvədə saxlayıb.
