Ümumdünya Qoruqlar və Milli Parklar Günü münasibətilə yanvarın 11-də Azərbaycanın milli parklarında "Açıq qapı" günü keçiriləcək.
Shimal.News məlumat verir ki, "Açıq qapı" günü çərçivəsində vətəndaşlar ölkənin müxtəlif bölgələrində yerləşən milli parklara baş çəkə, təbiət ərazilərini ziyarət edə biləcəklər.
Milli parklarımız Abşeron yarımadasında, ölkənin şimal, cənub və qərb hissəsində yerləşməklə rəngarəng biomüxtəliflik və landşaft komplekslərini əhatə edir.
Şimalda 1929-cu ildə Qızılağac və Zaqatala qoruqları, 1990-cı ildə Altıağac Dövlət Təbiət Qoruğu yaradılıb.
Eyni zamanda 2003-cü ildə Türyançay, Pirqulu, İlisu, Qarayazı, İsmayıllı, 2008-ci ildə isə Zaqatala Dövlət Təbiət qoruqlarının əraziləri 2-3 dəfədən çox genişləndirilib. Onu da qeyd edək ki, ölkəmizdə 2003-cü ilə kimi Milli parklar mövcud olmayıb. 2003-cü ildən başlayaraq ETSN tərəfindən Ordubad, Şirvan, Ağ göl, 2004-cü ildə Hirkan, Altıağac, 2005-ci ildə Abşeron, 2006-cı ildə Şahdağ, 2008-ci ildə isə Göygöl Milli parkları yaradılıb.
