Xaçmaz Rayon İcra Hakimiyyətində xidmət təşkilatlarının rəhbərləri və yerli icra nümayəndələrinin iştirakı ilə müşavirə keçirilib. Bu barədə ShimalNews 21 iyun tarixində RİH-yə istinadən məlumat verir.
Səyyar qəbullar zamanı vətəndaşlar tərəfindən qaz, işıq, su, yol və rabitə təchizatı ilə bağlı qaldırılan məsələlərin həlli və bu istiqamətdə görülən işlər ətraflı müzakirə edilib.
İcra başçısı Elnur Rzayev suvarma suyuna olan tələbatın ödənilməsi, yerlərdə yol təsərrüfatının mövcud vəziyyəti, abonentlərin elektrik enerjisi, qaz, rabitə və internetlə təchizatı istiqamətində həyata keçirilən tədbirlərdən danışıb. Bu sahələr üzrə mövcud nöqsanların aradan qaldırılması istiqamətində müvafiq tapşırıqlarını verib.
Müşavirədə, eləcə də yay mövsümünün gəlişi ilə əlaqədər olaraq, yol kənarlarının, park və xiyabanların təmiz saxlanılması, yaşıllıqlara aqrotexniki qulluq məsələsi də müzakirə olunub.
Tapşırıqların icrası ilə bağlı xidmət təşkilatlarının rəhbərləri və yerli icra nümayəndələri qarşısında tələblər qoyulub.
