Demokrat.az-ın məlumatına görə, hadisə 2022-ci ilin sentyabrın 25-də rayonun kəndlərindən birində baş verib. Səbuhi həmin gün saat 13 radələrində sərxoş vəziyyətdə qonşusu Əmirin evinin həyətində arvadı ilə mübahisə edib və qisas məqsədilə ona yumruqla zərbələr vurub. Sevil müxtəlif dərəcəli xəsarət alıb.

Səbuhi Cinayət Məcəlləsinin 128-ci maddəsi ilə ittiham olunub və özünü təqsirli bilib. O, ifadəsində həyat yoldaşı ilə qısqanclıq zəminində mütəmadi mübahisələr etdiklərini qeyd edib. 2008-ci ildə Sevil ilə ailə həyatı qurduqlarını, 3 övladları olduğunu və əvvəlcə valideynləri ilə, sonra isə özlərinə verilmiş ayrı evdə yaşadıqlarını söyləyib.

Səbuhi ifadəsində bildirib ki, sentyabrın 25-də, saat 13 radələrində mağazadan iki şüşə pivə alaraq içib və evə gedib. Evin arxasında fındıq yığan Sevilə yaxınlaşıb, ona anası Kəmaləni niyə həyətə buraxmadığını və mübahisə etdiyini soruşub. Bu sualdan sonra aralarında mübahisə başlayıb. Sevil fındıq bağından çıxıb və Əmirin həyətyanı sahəsinə keçib. Səbuhi onun arxasınca gedərək həmin həyətdən çıxmasını tələb edib. Mübahisə orada da davam edib və Sevil ona xoşagəlməz sözlər deyib. Bu sözlərə əsəbləşən Səbuhi Sevilin qollarından tutub və burnuna bir zərbə vurub. Sonra isə onu itələyərək evə getməsini söyləyib.

Zərərçəkmiş Sevil ifadəsində bildirib ki, həyat yoldaşı mütəmadi olaraq sərxoş vəziyyətdə mübahisələr yaradıb. O, sentyabrın 25-də fındıq yığarkən mobil telefonda musiqiyə qulaq asıb.

Səbuhinin onu mobil telefonla çəkdiyini görüb və əli ilə rəqs hərəkəti edib. Həmin vaxt Səbuhi onu qısqanıb və mübahisə etməyə başlayıb.

Fındıq bağından çıxıb qonşusunun həyətyanı sahəsinə keçərkən Səbuhi onu təqib edib və döyüb. Burnu qanayan qadın xəstəxanaya gedib.

Zaqatala Rayon Məhkəməsi Cinayət Məcəlləsinin 73.2-ci maddəsinə əsasən, Səbuhi barədə cinayət təqibinə xitam verib və onu cinayət məsuliyyətindən azad edib. Sevil əri ilə barışdığını və ona qarşı heç bir şikayəti olmadığını bildirib.