Qusar rayonunda 22 yaşlı Amil Qocayev şəxsi münasibətlər zəminində yaranan mübahisə zamanı 37 yaşlı Ramiz Eldarovu öldürməyə cəhd edib.
Demokrat.az-ın məlumatına görə, Amil 2020-ci ilin oktyabrın 28-də, günorta saatlarında özlərinə məxsus bağ sahəsini sulamaq üçün gedib və orada təxminən 0.5 litrə yaxın spirtli içki qəbul edib.
O, saat 18:00 radələrində Nəcəfkəndoba kənd sakini olan tanışı Ramizin 100 manat məbləğində borcunu qaytarması üçün mobil telefonuna zəng edib. Sonuncu isə zənglərə cavab vermədiyi üçün Amil nalayiq sözləri mesajla Ramizə göndərib.
Söyüş dolu mesajı oxuyan borclu şəxs ona zəng edərək, təhqiramiz ifadələrinə görə onu telefonda təhqir edərək söyüb. Hər iki şəxs aralarındakı mübahisəni aydınlaşdırmaq üçün Qılahoba kəndində yerləşən qəbiristanlığın kənarında görüş təyin ediblər.
Amil əvvəlcədən özü ilə bıçaq götürüb. Görüşə gələn kimi isə heç bir söz demədən Ramizin qarın və sinə nahiyələrinə qəsdən bir neçə zərbə vurub. Ramizin yerə yıxılmasına baxmayaraq, onu öldürmək məqsədi ilə sonuncunun bədəninin həyat üçün təhlükəli olan döş qəfəsinin sol tərəfinə, həmçinin digər nahiyələrinə bıçaqla ardarda yenidən zərbələr vurub.
Hadisə yerində olan Nəcəfkəndoba və Qılahoba kənd sakinləri Amilə mane olmağa çalışsalar da, o, Ramizi öldürmək məqsədi ilə zərbə vurmağa davam edib.
Şahidlərdən biri Amili kənara çəkərək Ramizi uzaqlaşdırıb. Həmin vaxt Ramiz ayağa qalxaraq qaçmasına baxmayaraq Amil onun dalınca qaçaraq çatıb və arxa tərəfinə qəsdən bir neçə dəfə də vurub.
Cinayət işi üzrə təqsirləndirilən şəxs qismində ifadə verən Amil ona elan olunmuş ittiham üzrə özünü qismən təqsirli bilib. O, ifadəsində göstərib ki, Ramizlə normal münasibətləri olub, düşmənçilik və ya ədavətləri olmayıb.
Məhkəmənin hökmü ilə Amil 10 il 6 ay müddətinə azadlıqdan məhrum edilib. Onun cəzasını ciddi rejimli cəzaçəkmə müəssisəsində çəkməsi müəyyən edilib.
