Qusar teatrının nümayəndələri teatr-tamaşa və konsert müəssisələrinin fəaliyyətinə həsr olunan müşavirədə iştirak ediblər. Bu haqda ShimalNews 29 yanvar tarixində məlumat verir.
Tədbir Lənkəran şəhərindəki Heydər Əliyev Mərkəzində təşkil edilib. Toplantıya Mədəniyyət naziri Adil Kərimli və məsul əməkdaşları, regional mədəniyyət idarələrinin rəisləri, Gəncə, Sumqayıt, Mingəçevir, Lənkəran, Qazax, Şəki, Ağdam, Füzuli, Qax, Qusar və Salyandan teatr və konsert müəssisələrinin rəhbərləri qatılıblar.
Müşavirədə bildirilib ki, repertuar tərtib edilərkən nazirlik tərəfindən yaradılmış “Teatr-tamaşa müəssisələrinin illik repertuarlarının və dövlət sifarişi əsasında hazırlanan tamaşaların məzmununun qiymətləndirilməsi üzrə Ekspert şurası”nın rəyləri nəzərə alınmalıdır. Teatrlarda bədii şuraların aktiv fəaliyyəti təmin olunmalı, marketinq və teatr-sponsor strategiyasının formalaşdırılması, rəhbərlər üçün treninqlərin keçirilməsi, dramaturqlarla əlaqələrin qurulması diqqətdə saxlanılmalıdır.
Həmçinin vətəndaşların, xüsusilə də həssas qrupların teatr və konsert müəssisələrinin xidmətlərindən lazımi şəkildə istifadəsi məqsədilə inklüziv layihələrin də həyata keçirilməsi vurğulanıb.
