Quba rayonunun Amsar kəndində sel təhlükəsi yenidən sakinləri narahat etməyə başlayıb.
Shimal.News-a müraciət edən kənd sakinlərinin sözlərinə görə, kəndin "Çayüzü" adlanan hissəsində yerləşən yüksəkgərginlik elektrik xətlərinin dirəyi ciddi təhlükə altındadır. Sel suları dirəyin ətrafındakı torpaq qatını yuyub apardığından onun hər an aşma ehtimalı yaranıb.
Sakinlər bildirirlər ki, problem yeni deyil. Əvvəlki sel hadisələri zamanı da ərazidə yol və sahil hissələri zərər görüb. Hətta həmin vaxt yuyulan ərazilərin bir hissəsi burada yaşayan vətəndaşlardan biri tərəfindən şəxsi vəsaiti hesabına bərpa olunub. Lakin son yağışlar və təkrarlanan sel hadisələri nəticəsində vəziyyət yenidən ağırlaşıb.
Onların sözlərinə görə, hazırda sel suları yolun kənarlarında ciddi eroziya yaradıb. Bu isə həm nəqliyyatın hərəkəti, həm də ərazidə yaşayan insanlar üçün təhlükə yaradır. Xüsusilə elektrik dirəyinin aşması ehtimalı sakinlərin narahatlığını daha da artırır.
Kənd sakinləri qeyd edirlər ki, çayın məcrasının dəyişməsi nəticəsində hər güclü yağışdan sonra problem daha da böyüyür. Buna baxmayaraq, ərazidə nə sahilbərkitmə işləri aparılıb, nə də hər hansı qabaqlayıcı tədbirlər görülüb.
Sakinlər aidiyyəti qurumları əraziyə baxış keçirməyə və təxirəsalınmaz tədbirlər görməyə çağırırlar. Onlar xəbərdarlıq edirlər ki, vaxtında müdaxilə olunmasa, növbəti sel həm yol infrastrukturuna, həm də yaxınlıqdakı yaşayış evləri və elektrik təsərrüfatına ciddi ziyan vura bilər.
