Quba rayonundan olan hərbi qulluqçu dünyasını dəyişib. Bu haqda ShimalNews 6 aprel tarixində xəbər verir.
Məlumata görə, 19 yaşlı əsgər Saleh Xələfov ötən gün təlim atış çalışmalarında iştirak edib. Həmin vaxt ona təhkim olunmuş odlu silahdan açılmış atəş nəticəsində hərbçimiz vəfat edib. Məlumatı Səfərbərlik və Hərbi Xidmətə Çağırış üzrə Dövlət Xidmətinin Quba rayon şöbəsi təsdiqləyib.
Fakt üzrə Qubadlı Hərbi Prokurorluğunda Azərbaycan Respublikası Cinayət Məcəlləsinin müvafiq maddəsi ilə cinayət işi başlanılaraq şahidlər dindirilib. Müxtəlif ekspertizalar təyin edilərək icraya yönəldilib və təxirəsalınmaz zəruri istintaq hərəkətləri həyata keçirilib. Bildirilib ki, hazırda istintaq davam etdirilir və qanunvericiliyin tələblərinə uyğun olaraq, bütün tədbirlərin görülməsi təmin olunacaqdır.
O, ötən ilin oktyabr ayında hərbi xidmətə yola düşmüşdü.
