Qubada 26 İyun - Azərbaycan Silahlı Qüvvələri Günü münasibətilə keçirilən tədbir zamanı şəhid atası Akif Mirzəyev hisslərinə hakim ola bilməyib. Bu barədə ShimalNews 24 iyun tarixində “Bizim.Media”ya istinadən məlumat verir.
Tədbir Fövqəladə Hallar Nazirliyinin hərbi hissəsində keçirilib. Burada Vətən müharibəsi şəhidi Nuran Mirzəyevin atası da iştirak edib.
“O, həmişə oğlu ilə "Xatırla məni" mahnısına rəqs etməyindən, itki ağır olsa da, onunla fəxr etdiyindən danışıb. Tədbirdə dedim, gəl, o mahnını sifariş verək. Verdik. Mahnını yerli müğənnilərimiz Məqsəd və Sevil ifa edəndə şəhid atası Akif Mirzəyev göz yaşlarını saxlaya bilmədi, kövrəldi. Tədbir iştirakçılarımız və əsgərlər şəhidi hörmət və ehtiramla andılar. Düzü, atanın göz yaşları mənə də pis təsir etdi. Amma mən hesab edirəm ki, bizim bütün şəhidlərimiz kimi, Nuran Mirzəyev də xatirələrimizdə və qəlbimizdə yaşayır”, - deyə Xaçmaz Regional Mədəniyyət İdarəsinin Quba rayonu üzrə nümayəndəsi Fuad Orucov söyləyib.
Mirzəyevlər ailəsi milliyyətcə ləzgidirlər. Onların yeganə övladları Nuran 2020-ci il oktyabr ayının 9-da Qubadlı rayonu istiqamətində şəhid olub. O, hərbi xidmətə getməzdən əvvəl atası və doğmaları ilə "Xatırla məni" mahnısına rəqs edib. Ötən gün bu rəqsin və atanın tədbirdə kövrəlməsinin görüntüləri sosial şəbəkədə yayılıb:
[video width="576" height="576" mp4="https://shimal.news/storage/photos/2023/06/ssstik.io_1687593491120.mp4"][/video]
