Aprelin 5-dən başlayaraq, Quba rayonunda yaşayan dağ yəhudiləri Pesax bayramını qeyd edirlər. Bu barədə ShimalNews 5 aprel tarixində məlumat verir.
Pesax bayramı dünya yəhudilərinin azadlıq və bahar bayramıdır. O, aprelin 13-dək davam edəcək. Pesax bayramı “Nisonu” da adlandırılır. Onu Qırmızı qəsəbədə yaşayan dağ yəhudiləri də qeyd edirlər.
Yəhudilər bayram günlərində sinaqoqa gələrək ibadət edirlər. Bayram süfrəsində, əsasən, Pesax bayramının simvolu sayılan Matsa (şit fətir) olur. Matsa o zaman xilas olan yəhudilərin çöllərdə qaynar daşın üzərində bişirdikləri yeganə qida idi. Su və unun qarışığından hazırlanan quru fətir duzsuz və mayasız olmalıdır. Bu, yəhudilərin əzab-əziyyətini yada salmaq anlamını daşıyır və Tanrıya şükür etmək rəmzi kimi qiymətləndirilir.
Bayram süfrəsinə, həmçinin yeddi növ göyərti və yeddi növ təam qoyulur: matsa, haroset (matsa ilə yeyilir, qoz-fındıqla, bəzən də xurma qarışığı ilə hazırlanır), soyutma yumurta, soyutma kartof, cırhacı almadan hazırlanan halva, balıq qızartması, kiduş-üzüm şirəsi.
