Quba rayonunun Amsar kəndində "Palmet" adlandırılan ərazidə suvarma problemi bağ sahiblərini çıxılmaz vəziyyətə salıb.
Məsələ ilə bağlı Shimal.News-a danışan sakinlərin sözlərinə görə, ərazidə bağların suvarılması üçün istifadə olunan generator borularında yaranmış nasazlıq aylardır aradan qaldırılmır. Bildirilir ki, borular deşilib. Həmin hissədən axan su ətraf ərazilərə yayılır, nəticədə gilas, alma və üzüm bağlarını su basır.
Onların iddiasına əsasən, problemlə bağlı aidiyyəti quruma dəfələrlə məlumat verilsə də, üç aydan artıqdır heç bir tədbir görülmür. Sakinlər deyirlər ki, nasazlığın vaxtında aradan qaldırılmaması məhsullara ciddi ziyan vurur və torpaq sahələrinin yararsız vəziyyətə düşməsinə səbəb olur.
