Quba Rayon Mərkəzi Xəstəxanasında əməkdaşlar arasında yenidən narazılıq yaranıb. Buna səbəb 1400-ə yaxın işçinin əməkhaqqını hələ də ala bilməməsidir.
İşçilərin Shimal.News-a verdiyi məlumata görə, əmək müqaviləsinə əsasən maaşlar hər ayın ən geci 10-dək ödənilməlidir. Lakin bu ay da müəyyən edilmiş müddət başa çatsa da, vəsait əməkdaşların kart hesablarına köçürülməyib.
Tibb işçiləri bildirirlər ki, maaşların gecikməsi onların sosial vəziyyətinə ciddi təsir göstərir. Xüsusilə kredit ödənişləri və gündəlik xərclərlə bağlı çətinliklər narahatlıq yaradır.
Adının açıqlanmasını istəməyən əməkdaşlardan biri qeyd edib ki, bu hal ilk dəfə deyil və zaman-zaman oxşar gecikmələr müşahidə olunur.
Xatırladaq ki, ötən aylarda xəstəxanada aparılan maliyyə yoxlaması zamanı ciddi nöqsanlar aşkarlandığı, baş mühasib Elşən Babayevin vəzifəsindən azad edildiyi barədə məlumat vermişdik. İddialara görə, o, külli miqdarda vəsaiti mənimsəməkdə şübhəli bilinirdi. Qeyd edək ki, həmin vəzifə hazırda da boşdur.
Onu da əlavə edək ki, əməkdaşlar dekabr ayında da analoji vəziyyətlə üzləşmişdilər.
