Qubanın Dərk kəndində yaşayan şəhidlər atası evsiz qalıb. Bu barədə ShimalNews 19 iyul tarixində Baku TV-yə istinadən xəbər verir.
90 yaşlı Mahur Məhərrəmovun Qoşqar və Eldar adlı övladları 1-ci Qarabağ müharibəsində şəhid olublar. 15 ildir ki, o, mənzil almaq üçün növbə gözləyirdi. Ötən ay isə onun yaşadığı ev yanaraq külə dönüb.
“Bu evdə atamla bir yerdə yaşayıram. Atam xəstədir, bu qədər faciədən sonra ağlını da itirib. Iki qardaşım şəhid olub. Onlardan birini bura gətirib torpağa tapşırmışıq, digəri itkin düşüb. Bir sümüyünü də tapmamışıq. Əvvəldən ev-zad verməyiblər, heç olmasa, indi köməklik eləsinlər bizə”, - deyə şəhidlərin bacısı Güleynaz Məhərrəmova bildirib.
Məsələ ilə bağlı Quba İcra Hakimiyyətindən bildirildi ki, ailəyə 2000 manat yardım edilib. Həmçinin ailənin vəziyyəti nəzərə alınaraq, evin tikintisi üçün Əmək və Əhalinin Sosial Müdafiəsi Nazirliyinə müraciət olunub.
Sosial Xidmət Agentliyindən isə bildirildi ki, imtiyazlı kateqoriyadan olan şəxs fərdi yaşayış evinin tikilməsinə görə nazirliyə torpaq sahəsi təqdim etməyib. Mənzilin tikintisi ilə bağlı yaxın günlərdə agentliyin əməkdaşları əraziyə baxış keçirəcəklər. Qiymətləndirilmə aparıldıqdan sonra müvafiq qərar veriləcək.
[video width="1920" height="1080" mp4="https://shimal.news/storage/photos/2023/07/Bakutv.mp4"][/video]
