Qubanın Çiçi kəndində 40 il öncə istifadəyə verilən kənd tam orta məktəbi hələ də qəzalı vəziyyətdədir. Bu barədə ShimalNews 22 sentyabr tarixində Real TV-yə istinadən xəbər verir.
Binanın döşəməsi çürüyüb, tavanı çökür, pəncərələri yoxdur, divarları isə çat verib. Şagirdlərin sözlərinə görə, onlar mövcud şəraitdə normal təhsil ala bilmirlər. Qış aylarında vəziyyət daha da acınacaqlı olur.
Müəllimlər isə məktəbin qəzalı olması səbəbindən dərslərə dəvamiyyətin cəmi 40-45 faiz olduğunu deyirlər:
“127 şagirdimiz var. Bu gün, məsələn 42 şagird dərsdə iştirak edib. Bütün avadanlıqların istismar müddəti bitib, qapı-pəncərələrimiz yararsız vəziyyətdədir, sinif otaqlarının çatlarına özünüz də baxa bilərsiniz. O gün yağan yağışda gəlib buranı görməklazım idi. Çox çətindir, bu, tədrisə çox böyük çətinlik törədir. Uşaqların dərsə davamiyyəti çox aşağı səviyyədədir”.
Çiçi kəndinin məktəb problemi ilə bağlı Quba Təhsil Sektorundan bildirildi ki, adıçəkilən yaşayış məntəqəsində yeni binanın tikintisi gələcək illərdə nəzərdə tutulub.
Eyni cavab 2022-ci ildə təhsil ocağının vəziyyəti gündəmə gətiriləndə verilmişdi. Yeni məktəb binası tikilənə qədər binanın qəzalı hissələri mühafizə olunaraq şagirdlərin təhlükəsizliyinin təmin ediləcəyi bildirilmişdi.
[video width="1920" height="1080" mp4="https://shimal.news/storage/photos/2023/09/shimal2-2.mp4"][/video]
