Qubalı Qaçaq Mayılın nəslindən olan millət vəkili Vahid Əhmədovun 77 yaşı tamam olub. Bu barədə ShimalNews 2 aprel tarixində məlumat verir.
Vahid Əhmədov 2 aprel 1947-ci ildə Qonaqkənd rayonunda (indiki eyniadlı qəsəbə) doğulub.
Əhmədov 1965-ci ildə Qonaqkənddə orta məktəbi bitirəndən sonra 1965-1971-ci illərdə indiki Azərbaycan Texniki Universitetində mühəndis-energetik ixtisasında təhsil alıb. 1989-1992-ci illərdə Almaniyanın Bonn Menecment İnstitutunda təhsilini davam etdirərək Beynəlxalq dərəcəli menecment-iqtisadçı diplomunu alıb.
1992-1993-cü illərdə Azərbaycan Respublikası Baş nazirinin müavini, birinci müavini olub. 1990-1995-ci illərdə Milli Məclisin deputatı, İqtisadi siyasət Komissiyasının sədri olub. Əhmədov 2005 və 2010-cu illərdə Milli Məclisə deputat seçilib. Deputat olduğu müddətdə Quba rayonu üçün vacib olan bir çox layihələrin – Quba-Qonaqkənd yolunun çəkilişi, Quba şəhərinin su təchizatı sisteminin yenidən qurulması, yeni məktəb binalarının inşası, kənd sakinlərinin qaza və içməli suya olan tələbatının ödənilməsi, rayonda hava limanının tikintisi və bir çox məsələlərin gündəmə gətirilməsi və icrası işlərində xüsusi xidmətləri olub.
Xeyriyyəçilik fəaliyyətinə görə 2001-ci ildə “Hacı Zeynalabdin Tağıyev mükafatı laureatı” adına layiq görülüb. Həmçinin Azərbaycan Respublikası Ali Sovetinin Fəxri Fərmanı və “Şöhrət” ordeni ilə təltif edilib. Milli Məclisdəki fəaliyyətinə görə dəfələrlə “İlin fəal millət vəkili” adına layiq görülüb.
