Qəbələ rayonunda Ümumdünya Şəhərsalma Forumunun On Üçüncü Sessiyası (WUF13) ilə bağlı festivala start verilib.
Shimal.News -un məlumatına görə, tədbirin ilk hissəsi çərçivəsində Qəbələ Dövlət Peşə Təhsil Mərkəzində müəllim və tələbələrin iştirakı ilə məlumatlandırma sessiyası keçirilib. Sessiyada WUF13-ün Azərbaycana əhəmiyyəti və forum çərçivəsində müzakirə olunacaq əsas mövzular barədə iştirakçılara məlumat verilib.
Bildirilib ki, mayın 17–22-də Bakıda keçiriləcək Ümumdünya Şəhərsalma Forumunun On Üçüncü Sessiyası ictimaiyyət üçün açıq olacaq.
Qeyd olunub ki, WUF13 Festivalı iki hissədən ibarətdir. Günün ikinci yarısında, saat 18:00-dan etibarən açıq havada ictimai proqramlar təşkil olunacaq.
Axşam proqramı çərçivəsində interaktiv fəaliyyətlər, maarifləndirici oyunlar, təqdimatlar və ictimai müzakirələr vasitəsilə dayanıqlı şəhər inkişafı, inklüziv şəhər mühiti, innovativ şəhər həlləri və gələcəyin şəhərləri kimi mövzular geniş auditoriyaya təqdim ediləcək. Eyni zamanda, forumun əsas ideyaları barədə ətraflı məlumat veriləcək.
