Qubadan keçən Qaraçay ətrafda yaşayan sakinlər üçün təhlükə yaradıb. Bu barədə ShimalNews 22 iyun tarixində Space TV-yə istinadən xəbər verir.
2-ci Nügədi kəndində sel suları kənd sakinlərinə məxsus torpaq sahələrini yuyaraq aparır. Bununla yanaşı, yaşayış evləri üçün də təhlükə mövcuddur.
Sakinlər deyirlər ki, qabağlayıcı tədbirlər görülməsə, çay evlərə də ziyan vuracaq:
“Burada çox güclü sel müşahidə olunur. Bu sel də yamacları yuyur və camaatın fərdi torpaq sahəsinə ziyan vurur”.
Məsələ ilə bağlı Quba suvarma sistemləri idarəsindən bildirildi ki, ərazidə mütəmadi sahil bərkitmə işləri görülür. Bununla belə sel nəticəsində daş bənd yuyulmaya məruz qalır. Bu səbəbdən beton bəndin inşası nəzərdə tutulub.
“Sözügedən ərazidə sahil mühafizə bəndlərinin tikintisi üzrə işlər həyata keçirilir. Növbəti ildən başlayaraq, daş beton bəndin tikintisi nəzərdə tutulur. Bu barədə təkliflər hazırlanaraq cəmiyyətə təqdim olunmuşdur”, - deyə baş mühəndis Samir Məmmədhüseynov bildirib.
Baş mühəndis onu da əlavə edib ki, ərazidə sel təhlükəsini yaradan amillərdən biri də daş karxanalarının qanunsuz fəaliyyətidir. Çay yatağının qazılması nəticəsində məcralar 20-30, bəzi yerlərdə isə 50 metr dərinliyə düşüb.
[video width="1080" height="1080" mp4="https://shimal.news/storage/photos/2023/06/Sequence-012.mp4"][/video]
