Oğuz rayonunda 67 yaşlı kişinin ağır sosial vəziyyətdə küçələrdə yaşadığı bildirilir.
Shimal.News-un əldə etdiyi məlumata görə, söhbət Əmrah Əhmədxanovdan gedir. Bildirilir ki, o, uzun illərdir spirtli içki aludəçisidir və hazırda yaşayacaq yeri yoxdur.
Məlumata əsasən, Əmrah Əhmədxanovun ailəsi illər əvvəl dağılıb. Onun iki oğlu olsa da, hazırda azadlıqdan məhrum ediliblər. İddialara görə, o, vaxtilə özünə məxsus ev və torpaq sahəsini sataraq əldə etdiyi vəsaiti xərcləyib. Həmçinin yaxın qohumları ilə münasibətlərinin yaxşı olmadığı da bildirilir.
Hazırda Əmrah Əhmədxanov Oğuz şəhərinin müxtəlif küçələrində gecələyir və çətin sosial şəraitdə yaşayır. Sakinlərin sözlərinə görə, o, bəzən ictimai iaşə obyektlərinə gələrək spirtli içki istəyir, istəyinə müsbət cavab verilmədikdə isə mübahisəli vəziyyət yaranır.
Yerli sakinlər hesab edirlər ki, bu şəxsə cəza deyil, sosial və tibbi dəstək lazımdır. Onlar aidiyyəti dövlət qurumlarını və sosial xidmət orqanlarını məsələyə müdaxilə etməyə, Əmrah Əhmədxanovun vəziyyətini qiymətləndirərək ona qanunvericiliyə uyğun sosial və zəruri tibbi yardım göstərməyə çağırırlar.
