İqtisadi siyasət, sənaye və sahibkarlıq komitəsinin sədri Tahir Mirkişili ödənişli Şimal-Cənub beynəlxalq nəqliyyat dəhlizi ilə bağlı qanunvericilik haqqında danışıb. Bu barədə ShimalNews 1 fevral tarixində məlumat verir.
Ödənişli yolda yığılan vəsaitdən istifadə edilməsi barədə hüquqi əsas yaradılmasını Milli Məclisin bu gün keçirilən plenar iclasında müzakirə ediblər.
"Bir müddətdir ki, Şimal-Cənub beynəlxalq nəqliyyat dəhlizinin tərkib hissəsi olan Bakı-Quba yolunun 129 kilometrlik hissəsi ödənişli yol kimi müəyyən edilib. Artıq bu yol fəaliyyətə başlayıb və ödəniləcək məbləği Tarif Şurası təsdiq edib. Amma qanunvericilikdə yığılan məbləğdən istifadə olunması ilə bağlı müəyyən qaydalar qəbul etmək barədə tələb də mövcuddur. Bu tələbi Nazirlər Kabineti işləyib. Amma qaydaların işləməsi üçün qanunvericilikdə bununla bağlı hüquqi əsas yaradılmalıdır. "Avtomobil yolları haqqında" qanuna edilən dəyişiklik qanunvericilikdə yığılan vəsaitdən istifadə edilməsi qaydalarının təsdiq olunmasına hüquqi əsas yaradır", - deyə Tahir Mirkişili bildirib.
