Kənd təsərrüfatı naziri Məcnun Məmmədov Quba, Qusar və Xaçmaz rayonlarına səfər edib. Bu barədə ShimalNews 1 aprel tarixində məlumat verir.
Quba rayonunun Zərdabi qəsəbəsində yerləşən Meyvəçilik və Çayçılıq Elmi-Tədqiqat İnstitutunun fəaliyyəti ilə tanışlıq keçirilib. Nazirə görülmüş işlər barədə məlumat verilib. O isə bitki genofondunun toplanması, saxlanması və seleksiyada istifadə olunması, daha məhsuldar yeni meyvə sortlarının yaradılması, yeni bitki becərmə texnologiyasının işlənməsi və fermerlərə elmi-texniki dəstəyin göstərilməsi prosesinin gedişi ilə maraqlanıb, kollektivə öz tapşırıq və tövsiyələrini verib.
Daha sonra nazir Qubanın Aşağı Atuc kəndində yerləşən “Zafars Nursery” tingçilik təsərrüfatına, Xaçmaz rayonunun Çarxı kəndində Aqrar Kredit və İnkişaf Agentliyinin dəstəyi ilə qurulmuş damazlıq heyvandarlıq təsərrüfatına baş çəkib. Təsərrüfatda damazlıq-seleksiya işlərinin təşkili, heyvanların saxlanma şəraiti və yem tədarükü prosesi ilə tanışlıq olub.
Məcnun Məmmədov Niyazoba kəndində yerləşən gündəlik istehsal gücü 100.000 ədəd olan yumurta istehsalı müəssisəsinin inşası prosesi ilə də maraqlanıb. Xudatda müasir fındıq emalı zavodu, Maqsudkənddə özəl sektor tərəfindən salınan yeni fındıq bağı layihəsinə diqqət yetirilib.
Qusarçay kəndində salınmış müasir superintensiv meyvə bağlarına, “Man Agro” və “Amoris” şirkətlərinə məxsus soyuducu anbarlara baş çəkilib.
Nazir, həmçinin "Azəraqrar Dövlət İstehsalat və Emal Birliyi" MMC-nin Qusar rayonunda yerləşən heyvandarlıq təsərrüfatı, “Azərbaycan-Türkiyə müştərək toxumçuluq müəssisəsinin əkin sahələri, Xaçmaz toxum emalı zavodu, Aqrar Xidmətlər Agentliyinin sort sınaq məntəqəsi, Bitki Mühafizəsi və Texniki Bitkilər Elmi-Tədqiqat İnstitutunun Xaçmaz dayaq stansiyasında olub, iş prosesinin təşkili ilə maraqlanıb, tapşırıq və tövsiyələrini verib.
