Xaçmaz şəhər 1 saylı tam orta məktəbdə hazırlıq siniflərində oxuyan azyaşlıların valideynlərinin məktəbə buraxılmaması ilə bağlı qərar narazılıq doğurub.
Shimal.News-un əldə etdiyi məlumata görə, bu gün məktəbdə iclas keçirilib. Valideynlərə açıq şəkildə bildirilib ki, tez-tez aparılan yoxlamalar və yuxarıdan verilən "tapşırıq" səbəbindən valideynlərin məktəb binasında övladlarını gözləmələrinə icazə verilməyəcək.
Nəticədə sərbəst şəkildə məktəbə gedib-gələ bilməyən şagirdlərin valideynləri qışın sərt günlərində, yağışlı və qarlı havalarda məktəbin həyətində və küçədə gözləməyə məcbur qalacaqlar. Dərs saatlarının qısa olması valideynlərin ərazidən uzaqlaşmasına imkan vermir və onlar azyaşlı övladlarını tək buraxmamaq üçün açıq havada gözləməlidirlər.
Xüsusi diqqət çəkən məqam odur ki, bu qərar məktəbin təmirsiz vəziyyəti, sinif otaqlarının soyuq və şəraitsiz olması, eləcə də binanın yanar materiallarla üzlənməsi ilə bağlı Shimal.News-un yayımladığı tənqidi materiallardan dərhal sonra qəbul edilib.
Valideynlər bunu problemlərin həlli deyil, əksinə, məktəbdə baş verən real vəziyyəti gizlətmək və ictimai nəzarəti minimuma endirmək cəhdi kimi dəyərləndirirlər.
Quba–Xaçmaz Regional Təhsil İdarəsi və məktəbin direktoru Gülbəniz Babayeva məktəbdəki real nöqsanları aradan qaldırmaq əvəzinə, problemin üzərini ört-basdır edən qərara imza atıblar. Valideynlər isə bildirirlər ki, çıxış yolu qadağalar və təzyiqlər deyil, məktəbdə təhlükəsiz, isti və normal təhsil mühitinin yaradılmasıdır.
