İsmayıllı rayonunda yerləşən "Günəş" istirahət mərkəzinin nəzdindəki zooparkda saxlanılan heyvanların acınacaqlı vəziyyəti ictimai narazılığa səbəb olub.
Shimal.News xəbər verir ki, sosial şəbəkələrdə yayılan məlumatlara görə, zooparkdakı heyvanlar lazımi qayğıdan məhrum vəziyyətdə saxlanılır.
Qəbələ-İsmayıllı yolunun kənarında yerləşən istirahət mərkəzinin zooparkında meymun, zebra, dəvə və digər heyvanların ac-susuz və baxımsız vəziyyətdə olduğu, heyvanların həyatı üçün təhlükə yarandığı qeyd olunur.
Heyvan hüquqlarının müdafiəçiləri və ictimaiyyət nümayəndələri vəziyyətlə bağlı təcili tədbirlər görülməsinə çağırış ediblər. Onlar müvafiq dövlət qurumlarını və heyvanları müdafiə təşkilatlarını məsələyə diqqət yetirməyə və heyvanların xilas edilməsi üçün tədbir görməyə çağırıblar.
Qeyd edək ki, Azərbaycanda heyvanlarla rəftara dair qanunvericilik mövcuddur və heyvanların saxlanma şərtlərinə riayət edilməməsi məsuliyyət yaradır.
