İsmayıllı şəhərində mağazaların birində soyğunçuluq edən şəxsdən odlu silah aşkar edilib. Bu barədə ShimalNews 9 fevral tarixində Daxili İşlər Nazirliyinin Mətbuat Xidmətinə istinadən xəbər verir.
Məlumata görə, hadisə zamanı kassadan 300 manat pul talanıb. Polis əməkdaşları “isti izlər”lə əməliyyat keçiriblər. Nəticədə şəhər sakini, əvvəllər narkotik üstündə dəfələrlə məhkum olunmuş Ruslan Məmmədov tutularaq istintaqa təqdim olunub.
Saxlanılan şəxsin yaşadığı evdə odlu silah gizlətdiyi də məlum olub. Həmin ünvana baxış keçirilərkən oradan lüləsi və qundağı kəsilmiş (“obrez”) tüfəng aşkarlanaraq götürülüb.
Faktla bağlı cinayət işi başlanılıb, R.Məmmədov təqsirləndirilən şəxs qismində istintaqa cəlb edilib. Onun qanunsuz əməllərindən zərər çəkən başqa vətəndaşlar varsa, ərazi polis orqanlarına və "102" Xidməti-Zəng Mərkəzinə məlumat verə bilərlər.
