İsmayıllı rayonunda intensiv yağan yağış səbəbindən təsərrüfat və bir çox turizm obyektlərinə zərər dəyib. Bu barədə ShimalNews 21 iyul tarixində “Bu gün”ə istinadən məlumat verir.
Sel nəticəsində Göyçay, Cülyan, Girdiman və Ax-Ox çaylarının torpaq mühafizə bəndləri yararsız vəziyyətə düşüb. Sakinlərin pay torpaqlarına xeyli ziyan dəyib. Həmçinin nəqliyyatın hərəkətində də çətinlik yaranıb.
Bununla bağlı İsmayıllı Suvarma Sistemləri İdarəsinin mühəndisi Elşad Mirzəyev görülən tədbirlər barədə danışıb:
“Biz əhalinin Cülyan çayından keçməsi üçün çayın hər iki üzünə körpü qoymuşuq ki, seldən sonra camaat rahat keçib gəlsin. Hal-hazırda da mühafizə bəndləri qurulur, çaylarımızda işlər davam edir. Lillənmə nəticəsində Göyçay çayı magistral beton kanalının çox hissəsi dolub. Ekskavatorlar bu kanalın üstündə işləyir, suyun verilişini bərpa etmək üçün bu günədək işlər davam etdirilir”.
[video width="1920" height="1080" mp4="https://shimal.news/storage/photos/2023/07/videoplayback5.mp4"][/video]
