Xaçmaz rayonunda kənd əhalisinin əsas qazanc mənbələrindən olan fındıq xarici bazara göndərilir. Bu haqda ShimalNews 1 fevral tarixində “Azərtac”a istinadən məlumat verir.
Rayonda 10-dan çox fındıq qəbulu məntəqəsi ilə yanaşı, emal və təkrar emal fabrikləri də fəaliyyət göstərir.
Qusarçay kəndində 20 ton məhsul fabrikdə bir gün ərzində emal olunur. Ləpənin 90 %-i isə xarici bazara ixrac edilir.
Müəssisənin icraçı direktoru Malik Eldarov bildirib ki, 2002-ci ildən fəaliyyət göstərən fabrikdə 150 işçi çalışır. Burada emal olunan məhsullar Rusiya, Almaniya, İtaliya, Belçika, Özbəkistan, Birləşmiş Ərəb Əmirlikləri və başqa ölkələrə göndərilir.
Xaçmazda fındıq bağlarının ümumi sahəsi təxminən 12.000 hektar təşkil edir. Onların 10.000 hektarı barverəndir. Cari mövsümdə artıq 8.462 ton məhsul tədarük olunub.
