Quba-Xaçmaz Regional Təhsil İdarəsi əvvəlki illərdə ümumi təhsil müəssisələrində oxuyub, ümumi orta və tam orta təhsil səviyyəsini bitirə bilməyən şəxslər üçün 31 yanvar 2026-cı il tarixdə eksternat qaydada imtahan təşkil edəcək.
Bu barədə Shimal.News-a təhsil idarəsindən məlumat verilib.
Bildirilib ki, eksternat qaydada aralıq imtahanlarında Quba-Xaçmaz Regional Təhsil İdarəsinin tabeliyində fəaliyyət göstərən təhsil müəssisələrində əvvəlki illərdə təhsil almış, lakin ümumi orta və ya tam orta təhsil səviyyəsini başa vura bilməyərək müraciət edərək qeydiyyatdan keçmiş şəxslər iştirak edəcəklər.
İmtahan Quba rayonu Rəhman Məmmədov adına Alekseyevka kənd tam orta ümumtəhsil məktəbində (Ünvan: Quba rayonu, Alekseyevka kəndi) keçiriləcək.
Qeyd edilib ki, imtahanın 11:00-da başlayır, imtahana gələcək vətəndaşlar 09:30-dan gec olmayaraq imtahan keçiriləcək ünvanda olmalıdır. Şəxsiyyət vəsiqəsini özü ilə gətirməyən eksternlər imtahana buraxılmayacaq.
Aralıq imtahanda uğur qazanmış eksternlər ümumi orta və tam orta təhsil haqqında sənəd (attestat) almaq üçün Dövlət İmtahan Mərkəzi tərəfindən ümumi və tam orta təhsil səviyyəsi üzrə keçirilən buraxılış imtahanlarında iştirak etmək hüququ qazanacaqlar.
Qeydiyyat müddətində imtahanda iştirak üçün ümumi orta təhsil sənədi (IX) üzrə 152, tam orta təhsil sənədi (XI) üzrə 349 nəfər, ümumilikdə isə 501 nəfər ərizə ilə müraciət edib.
