Azərbaycanda düyü idxalı azalıb. Mütəxəssislər bunu istehlakın azalması ilə deyil, yerli istehsalın artması ilə əlaqələndirirlər.
Dövlət Gömrük Komitəsinin məlumatına əsasən, 2026-cı ilin ilk altı ayında ölkəyə 25,6 min ton düyü idxal edilib. Bu, ötən ilin eyni dövrü ilə müqayisədə 16,6 faiz azdır.
İqtisadçı Fərahim Əsədov bildirib ki, düyüyə tələbat azalmayıb, əksinə, istehlak əvvəlki illərlə müqayisədə artıb.
Onun sözlərinə görə, idxalın azalmasının əsas səbəblərindən biri ölkədə çəltikçiliyin inkişafıdır. Xüsusilə Şəki-Zaqatala bölgəsində düyü istehsalının genişləndirilməsi istiqamətində işlər görülür.
İqtisadçı qeyd edib ki, dünya bazarında qiymətlər, logistika xərcləri və idxal mənbələrindəki dəyişikliklər də düyü idxalının həcminə təsir göstərən əsas amillərdəndir.
