Adət-ənənəyə görə, İsmayıllıda sakinlər bu gün tonqal qalayıb, alovun üzərindən tullanmaqla daxildə olan bütün çirkabı və azar-bezarları yandırırlar. Bu barədə ShimalNews 28 fevral tarixində Azərtac-a istinadən məlumat verir.
Qeyd olunan Od çərşənbəsi xalq arasında “üskü çərşənbə”, “üskü gecəsi”, “ikinci çərşənbə”, “ocaq çərşənbəsi”, yaxud “addı çərşənbə” də adlandırılır. İnsanlar tonqal qalayır, müxtəlif mərasimləri yerinə yetirirlər.
Ucqar kəndlərdə isə bu gün özünəməxsus şəkildə qeyd edilir:
“Bizim Lahıcda Od çərşənbəsində Niyal dağından gətirdiyimiz kürü-mürü (ardıc – red.) dediyimiz ağac budaqları yandırılır. Bunun üçün hündür bir yerdə mərasim təşkil olunur. Həmin ağacın budaqları yananda ocaqdan ətrafa qəribə xoş ətir yayılır”, - deyə Lahıc qəsəbə sakini Sahibə Abdullayeva bildirib.
Martın 7-də Hava (Yel), martın 14-də isə axırıncı - Torpaq çərşənbəsi qeyd olunacaq. Daha sonra martın 20-si axşam vaxtı Novruz bayramı keçiriləcək. Bu il üçün yaz fəslinin Azərbaycana gəlişi martın 21-i Bakı vaxtı ilə saat 01:24:24-ə təsadüf edəcək. Bu zaman gecə ilə gündüz bərabərləşəcək.
