Balakən rayonunda qəhvəyi mərmər bağacığının yayılmasının qarşısının alınması ilə bağlı regional seminar və sahə səfəri təşkil olunub.
Shimal.News xəbər verir ki, tədbir Kənd Təsərrüfatı Nazirliyi yanında Aqrar Xidmətlər Agentliyinin təşkilatçılığı və BMT-nin Ərzaq və Kənd Təsərrüfatı Təşkilatının (FAO) dəstəyi ilə həyata keçirilib.
Səfər zamanı yerli və xarici mütəxəssislər Balakən ərazisində zərərvericinin yayıldığı sahələrdə aparılan monitorinq və mübarizə tədbirləri ilə yerində tanış olublar. Xarici ekspertlər müşahidələrin təşkili, yayılma səviyyəsinin qiymətləndirilməsi və inteqrir mübarizə üsulları ilə bağlı beynəlxalq təcrübələrini bölüşüblər.
Seminar iştirakçıları daha sonra Balakəndə yerləşən gömrük-sərhəd keçid məntəqəsində aparılan fitosanitar və dezinseksiya tədbirlərini nəzərdən keçiriblər. Görüşdə qəhvəyi mərmər bağacığının transsərhəd yayılma risklərinin azaldılması və nəzarət mexanizmləri ətrafında fikir mübadiləsi aparılıb.
