Bu gün Azərbaycanın Milli Qəhrəmanı, şəhid Çingiz Qurbanovun ad günüdür.
Çingiz Salman oğlu Qurbanov 24 noyabr 1994-cü ildə Qusar rayonunun Həzrə kəndində anadan olub.
2012-ci ildə məktəbi bitirən Çingiz Qurbanov elə həmin ildə Azərbaycan Texniki Universitetinə daxil olub. O, 2016-cı ilin iyul ayında həqiqi hərbi xidmətə yollanıb.
Çingiz Qurbanov 2016-cı ilin dekabrın 29-da Azərbaycan–Ermənistan dövlət sərhəddində ermənilərin kəşfiyyat qrupunun təxribatının qarşısını alan zaman, ermənilərin pusqusuna düşüb və şəhid olub. Bütün beynəlxalq normaları pozan erməni tərəfi 2017-ci il fevralın 5-i Çingiz Qurbanovun nəşini Azərbaycan tərəfinə təhvil verib.
Fevralın 6-sı saat 09:30-da isə Çingiz Qurbanov ilə vida mərasimi baş tutub. O, doğulduğu Qusar şəhərində, Şəhidlər Xiyabanına son mənzilə yola salınıb.
