Qubada III Aqrobiznesin İnkişafı Forumu öz işini panel sessiyalarla bu gün davam etdirib. Bu barədə ShimalNews 29 mart tarixində məlumat verir.
Tədbir Kənd Təsərrüfatı Nazirliyi (KTN) yanında Aqrar Kredit və İnkişaf Agentliyi və BMT-nin Ərzaq və Kənd Təsərrüfatı Təşkilatının (FAO) birgə təşkilatçılığı ilə keçirilir. Burada KTN-in, İqtisadiyyat Nazirliyinin, Kiçik və Orta Biznesin İnkişafı Agentliyinin, Azərbaycan Sahibkarlar Təşkilatları Milli Konfederasiyasının rəhbər şəxsləri, nazirliklərin tabeli qurumlarının, Mərkəzi Bankın, ölkədə fəaliyyət göstərən bankların, həmçinin yerli və beynəlxalq təşkilatların nümayəndələri iştirak edirlər.
Forumda Azərbaycanda aqrar və ekoloji siyasətlərin qabaqcıl beynəlxalq təcrübələrə, texnoloji mübadilə və innovasiyalara uyğunlaşdırılmasından və daha geniş iqtisadi inkişaf üçün maliyyə dəstəyinin təmin edilməsindən danışılıb.
Bununla yanaşı, dünyada baş verən iqtisadi və ekoloji, o cümlədən iqlim dəyişikliyi ilə bağlı proseslərin “ənənəvi kənd təsərrüfatı istehsalı modeli”ndən “təsərrüfatın intensiv idarəedilməsi”nə keçidi şərtləndirdiyi vurğulanıb.
Daha sonra iştirakçılara Türk Dövlətləri Təşkilatına üzv ölkələrin kənd təsərrüfatı sahəsində mövcud vəziyyət və aqrar potensial barədə məlumat verilib.
Sonda “Azərbaycanda kənd təsərrüfatının maliyyələşdirilməsi üzrə mövcud vəziyyət”, “Aqrar sahənin maliyyələşmə ehtiyacları, tələb və təklif əsaslı qiymətləndirmə” mövzusunda təqdimatlar keçirilib.
