Yağan qar və şaxtalı hava şəraiti səbəbindən Bakı–Şamaxı–Yevlax avtomobil yolunun Ağsu dolaylarından keçən hissələrində, xüsusilə gecə saatlarında yolun hərəkət hissəsində buzlaşma yaranıb.
16 saylı Yol İstismar İdarəsinin baş mexaniki Ayaz Musalı AZƏRTAC-a bildirib ki, əlverişsiz hava şəraiti ilə əlaqədar yolun qardan və buzdan operativ təmizlənməsi məqsədilə Azərbaycan Avtomobil Yolları Dövlət Agentliyinin 16 saylı Yol İstismar İdarəsinin və Avtomobil Yollarının Mühafizəsi Xidmətinin canlı qüvvəsi və xüsusi texnikası əraziyə cəlb olunub.
Onun sözlərinə görə, yolun hərəkət hissəsində, xüsusilə enişli-yoxuşlu və sərt döngəli sahələrdə nəqliyyat vasitələrinin təhlükəsiz hərəkətini təmin etmək üçün qum-duz qarışığı səpilməklə profilaktik tədbirlər görülür.
Eyni zamanda, səhər saatlarında havanın temperaturunun aşağı düşməsi səbəbindən buzlaşma ehtimalı yüksəkdir. Bu səbəbdən sürücülərə mümkün qədər Ağsu dolayları istiqamətində hərəkət etməmək, zərurət yarandıqda isə sürət həddinə əməl etmək, ara məsafəsini qorumaq və qış təkərlərindən istifadə etmək tövsiyə olunur.
