Bu gün İkinci Vətən Müharibəsi şəhidi Tərlan Kərimovun anım günüdür.
Shimal.News xəbər verir ki, o, 8 avqust 1992-ci il tarixdə Şabran rayonunda anadan olub.
Azərbaycan Ordusunun baş leytenantı olan Tərlan Kərimov 2020-ci il sentyabrın 27-də Azərbaycan Silahlı Qüvvələri tərəfindən Ermənistanın işğalı altında olan ərazilərin azad edilməsi üçün başlanan Vətən müharibəsi zamanı Füzulinin azadlığı uğrunda gedən döyüşlərdə savaşıb.
Tərlan oktyabrın 1-də Füzuli rayonu istiqamətində gedən döyüşlərdə düşmən tərəfindən atılan artilleriya atəşi nəticəsində şəhid olub.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin Sərəncamına əsasən Tərlan Kərimov ölümündən sonra "Vətən uğrunda", "Döyüşdə fərqlənməyə görə", “İgidliyə görə”, “Kəlbəcərin azad olunmasına görə” medalları 3-cü dərəcəli “Rəşadət” ordeni ilə təltif edilib.
