Əslən Oğuz rayonunun Xaçmazqışlaq kəndindən olan və hazırda Balaxanı Neft-Qaz Çıxarma İdarəsində işləyən Şərif Kərimov Bizim.Media-ya müraciət edərək, Birinci Qarabağ Müharibəsi zamanı onu ölümdən xilas etmiş qubalı əsgər yoldaşı Rövşəni axtardığını bildirib.
Şərif Kərimov bildirib ki, 1991-ci ildə Bakıda təhsil alıb, daha sonra hərbi xidmətə çağırılaraq Ağdamın Əfətli və Əliağalılar kəndi istiqamətində gedən döyüşlərdə iştirak edib. Birinci Qarabağ Müharibəsinin 2-ci qrup əlili olan Kərimov Fərrux yüksəkliyində ağır yaralananda onu döyüş meydanından çıxarıb xilas edən qubalı əsgər yoldaşı Rövşən olub.
Şərif Kərimov həmin hadisəni belə xatırlayır:
"Vəziyyət çox ağır idi. Hamı məcburən mövqeləri tərk edirdi. Amma Rövşən məni tək buraxmadı. O, öz silahı ilə yanaşı mənim də silah-sursatımı daşıyaraq məni 3 kilometr məsafədə sürüyüb mövqelərimizin olduğu yerə çatdırdı.
Əgər o, məni sürüyüb gətirməsəydi, ya ermənilərə əsir düşəcəkdim, ya da döş qəfəsimdən aldığım yaranın qanaxmasından öləcəkdim. O, məni həm ölümdən, həm də əsirlikdən xilas etdi. Bu 33 ildə yaşadığım hər günə görə ona borcluyam".
Şərif Kərimov bildirir ki, 1992-ci ildə bir neçə dəfə yaralanıb, hospitallarda müalicə aldıqdan sonra 2-ci qrup əlil kimi ordudan tərxis olunub.
Keçmiş döyüşçü axtardığı Rövşəni sonuncu dəfə 1993-cü ilin yanvar ayında gördüyünü deyir.
Onun sözlərinə görə Rövşəni tapmaq üçün 7–8 il əvvəl Qubaya da gedib. Səfərbərlik və Hərbi Xidmətə Çağırış üzrə Dövlət Xidmətinin Quba rayon şöbəsində və Quba Əlillər Cəmiyyətində soruşsa da, tanıyan olmayıb.
Şərif Kərimov deyir ki, Rövşənin yalnız adını xatırlayır — nə soyadını, nə də Qubada hansı ünvanda yaşadığını bilir. Şərif Kərimov onu ölümdən xilas edən və 32 ildir görmədiyi əsgər yoldaşı ilə yenidən görüşməyi, ailəsinə tanıtmağı çox istəyir.
Məlumata görə, 1973-cü il təvəllüdlü Rövşən Piri oğlu Şükürov 1992-ci ildə Bakıda Dəniz piyadaçıları hərbi hissəsində qulluq edib, Qarabağ müharibəsində iştirak edib və Ağdərədə yaralanıb.
