Yağıntılı hava şəraiti Qubadakı alma bağlarında həm məhsuldarlığın, həm də meyvənin keyfiyyətinin aşağı düşməsinə səbəb olub.
Artıq alma yığımı başlayıb. Fermerlərin sözlərinə görə, tədarük əvvəlki illərlə müqayisədə xeyli qısa çəkir.
Fermerlər bildirirlər ki, bu il eləcə də müxtəlif xəstəliklər yayılıb. Nəticədə həm ağaclardan toplanan məhsulun miqdarı azalıb, həm də meyvənin böyük hissəsi keyfiyyətini itirib.
Sahibkarlardan biri deyib ki, 1,5 hektarlıq bağında bu il 14-15 dəfə dərmanlama aparıb. Buna baxmayaraq, əvvəlki illərdə 10-11 min manat civarında olan xərclərin qarşılığını bu mövsüm əldə etmək mümkün olmayıb.
Onun sözlərinə görə, ötən il həmin sahədən təxminən 16 ton məhsul götürülüb. Bu il isə məhsulun cəmi 6 ton civarında olacağı gözlənilir. Fermer bu vəziyyətin nəticəsində təxminən 7-8 min manat zərər etdiyini bildirib.
Digər təsərrüfat sahibləri də meyvənin satış qiymətindən narazıdırlar. Bildirilir ki, keyfiyyətinə görə aşağı kateqoriyaya aid edilən almaları emal müəssisələri çox aşağı qiymətə qəbul edir.
Mütəxəssisin sözlərinə görə, əlverişsiz hava şəraiti nəticəsində alma bağlarında məhsuldarlıq nisbətən aşağı düşüb. Meyvələrin təxminən 60-70 faizinin dəmgil və digər göbələk xəstəliklərinə yoluxduğu bildirilir.
Bu səbəbdən fermerlərə yığım başa çatdıqdan sonra bağlarda payız-qış becərmə işlərinə diqqət yetirməyi tövsiyə edilir. Eləcə də budama və qış müalicəsi düzgün aparılmalıdır ki, növbəti mövsümdə məhsuldarlıq və meyvənin keyfiyyəti yüksəlsin.
Həmçinin bağların sığortalanmasının məqsədəuyğun olduğu qeyd olunub.
Mənbə: Baku TV
